Arabako kanpo merkataritzak 2004ko hirugarren hiruhilabetean zehar izandako garapenak
jaso egin du nazioarteko ekonomiaren susperraldiaren eragina. Elkarren segidako bigarren
hiruhilabetez, hazkunde handia izan du Arabako kanpo merkataritzak, esportazioak %28,7
eta inportazioak %30,7 handitu direlarik.
2004ko lehenengo bederatzi hilabeteen balantzeak adierazten du kanpoko salmentak 2.923,4
milioi eurokoak izan direla. Hau da, %30,3ko gorakada izan dute 2003ko aldi berarekin
konparatuta. Inportazioei dagokienez, kanpoan egindako erosketak 1.740 milioi eurokoak
izan dira, hots, %23 handitu dira 2003 urtearekin konparatuta. Hori dela eta, Arabako
kanpo merkataritzak 1.183,4 milioi euroko balantza positiboa lortu du 2004ko urtarrila
eta iraila bitartean, esportazioek inportazioen gainean duten estaldura tasa %168 izan
delarik. Tasa hori 2003ko aldi berean izandako %158,6ko tasa baino pixka bat handiagoa
izan da.
Muga zergen kontu sail ezberdinei dagokienez, Arabako kanpo merkataritzaren emaitza ona
hiru sail jakinek bultzatu dute: hasteko, garraio materialak (esportazioak %61,4 eta
inportazioak %47,3 handitu dira); bigarrenez, metalek eta horien manufakturek (esportazioak
%26,3 eta inportazioak %29,7 handitu dira); eta hirugarrenez, kautxuak eta plastikoek
(esportazioak %12,8 eta inportazioak %20,2 handitu dira).
Arabako kanpo salmentak 15 kideko EBra doaz gehienbat oraindik ere. 2004ko urtarrila
eta iraila bitartean Arabak eskualde horretara egindako esportazioak %23,9 handitu dira
2003ko aldi berarekin konparatuta. Esportazio kopuru horrek Arabak hilabete horietan
egindako guztizko esportazioen %72,3 hartzen du. Frantzia (%21,1) eta Alemania (%19,3)
Arabaren bezero nagusiak dira oraindik ere. Ondoren datoz Erresuma Batua (%8,8), Italia
(%5,9) eta Portugal (%4,9). Aipatzekoa da Japonen aurrerakada handia Arabako esportazioen
bezero gisa. Oraindik Arabako kanpo salmenten %2,6 soilik hartzen badu ere, 2004ko lehenengo
bederatzi hilabeteetan Japonek egindako erosketak 7 bider handitu dira.
Inportazioen kasuan, beherakada indartsuagoa izateaz gain, orokorragoa izan zen eta muga zergen
atal gehiagotara hedatu zen; horrela, diruaren ikuspegitik garrantzi apur bat duen atal bat soilik
igo zen urtean zehar (% 6,4), metalena eta manufakturena. Azpimarragarriena garraioko materialen
inportazioen beherakada nabarmena (% -47) izan zen.
Informazio ekonomikoa
Informazio estrategikoa
